هل بالغت في زعلي..وجهوني..قلبي محروق - منتدى عالم الأسرة والمجتمع
logo

الملاحظات

المتزوجين مواضيع تهم المتزوجين من الرجال والنساء.

 
أدوات الموضوع
انواع عرض الموضوع
قديم 08-05-2011, 03:19 PM
  #1
فضلا ادخلوا
عضو جديد
تاريخ التسجيل: May 2011
المشاركات: 40
فضلا ادخلوا غير متصل  
هل بالغت في زعلي..وجهوني..قلبي محروق


السلام عليكم ورحمة الله وبركاته

لي ثلاث أسابيع

فرفرت المنتديات فرفرة وما لقيت أفضل من هذا المنتدى لطرح مشكلتي..

وتصفحت في هذا المنتدى الكثير من المشاكل الزوجية لكني ماوجدت ما يماثل حالتي..

أخواني وأخواتي في الله ربما أطلع زوجي على الموضوع فأرجوا منكم النصح والتوجيه لكلانا..خاصة

الأخ

رجل الرجال والبليغ والاخت سيدة الموقف
تعجبني ردودهم وتحليلهم للأمور.

وأكيد أكيد أكيد لا أستغني عن الباقين بتوجيه ونصح ودعوة بظهر الغيب.

أولا انا سيدة في الأربعينات وهذا زواجي الثاني من رجل خمسيني مطلق

كلانا أنجب من زواجه السابق والحمد لله

عمر زواجنا أقل من السنتين..

عملت اختبار للشخصيات طلعت أنا شمالية وزوجي جنوبي

بإختصار

أنا طيبة, حنونة ,واثقة, جادة,, حازمة,, هادئة (لكن ينقلب هدوئي مع زوجي إلى جنون عندما أعصب وأكون

حقانية في عصبيتي ما أعصب من غير وجه)


زوجي كسول قالب ثلج طيب حنون مراوغ غير واضح

المهم تزوجنا وسكنا ببيتي لانه حالته المادية غير مستقرة خاصة وأنه يصرف على الطليقة وأبنائها..بحجة هي

ماعندها وظيفة.

في ذلك الوقت ما اعتبرتها مشكلة.. لأنه وعدني بالصرف علي ..مع مدي يد العون له فقط حتى يعتمد الأبناء

على أنفسهم..

يعني مني البيت ومنه الصرف على البيت.

حصل مالم يكن في حسباني

منذ بداية زواجنا وأنا في معارك طاحنة مع زوجي بسبب نقضه لجميع العهود والمواثيق اللي اتفقنا عليها..

طالبته بتنفيذ الوعود بقوة وصرامة كان في كل مرة يزعل يهجرني ويترك البيت

كان يستخدم معي المساومة وأساليب الضغط النفسي كي اتنازل عن حقوقي المادية كزوجة.

بما أني أسكن مع أهلي في نفس العمارة..هجره كل مرة كان يسبب لي معهم حرج شديد جدا

خاصة أمي تسألني في اليوم مليون مرة فين زوجك ليش مارجع البيت

وكل مرة اكذب على أهلي مرة عنده شغل ومرة عنده دورات وهكذا..

وأظل أسترضيه بالرسائل أتنازل عن حقوقي عشان يرجع البيت ولا يسبب لي الفضايح مع أهلي..

أنهيت مشاكلي المادية معه بإتفاقيات جديدة (بالتنازل عن حقوقي المادية كزوجة فترة زمنية محددة..ورضيت

بفتات الفتات.. لحين يعتمد أبناؤه على أنفسهم)

قلت أصبر لعل الله يحدث بعد ذلك أمرا..

هجره لي سبب لي اهانات بالغة مو قادرة أنساها

يعني البيت فندق متى مازعل خرج ومتى مارضي رجع

حسيت نفسي بلا قيمة ولا تقدير.

هجر غير شرعي من غير وجه حق + ضغط نفسي عشان أتنازل عن حقوقي

آآآآآآآآآآآآآآآآآآآآآه ياحريم الله لا يذوقكم قهرالرجال..والله الهجر يموت قهر

ياقلبي على نفسي أقبلت على الزواج بكل معاني الصدق والاخلاص وحطيت إيدي بإيده

لكن زوجي الصراحة ماصان النعمة وصدمت بواقع أمر من الصبر

المهم

الضغوطات النفسية اللي مريت بها سببت لي ألم نفسي عميق وجرح دفين

مهما كتبت ماراح أقدر اوصف اللي في نفسي..... وهذا كان يسبب لي دوما الحزن والألم..والبكاء من أتفه

سبب.

يكفي أن أقول لكم فقدت الإحساس بالأمان.. وفقدت الثقة بزوجي..

المهم مرت الأيام بحلوها ومرها

قبل شهر تقريبا أجرى زوجي عملية جراحية..

الصراحة وقفت معاه منحته حنان الام وعطف الإبنة وحب الزوجة ووو.........الخ

أوليته كامل الرعاية والإهتمام وتغيبت عن شغلي عشان أخدمه وأكون بجواره

حتى إن الطبيب اللي أجرى له العملية في يوم المراجعة (سابع يوم العملية) شكرني وقال تستحقي شهادة تقدير

في رعاية زوجك وهذا واضح في الجرح..


معليش اتحملوني الكلام اللي فوق كله مقدمات نجي للمشكلة

ثالث يوم اجراء العملية..رن جوال زوجي وكان هو بالحمام أكرمكم الله..

كان رقم ابنه

(زوجي معطيني الصلاحية أرد على أبنائه..وأنا كنت لا أرد على اتصالاتهم..وهذه هي المرة الاولى التي رديت

فيها لأنه مريض ومو عند الجوال)

رديت

كانت الهانم طليقته

فوجئت بي

وتفاجأت بها

صارت تقول أنت من؟

وأنا أبادلها السؤال بنفس السؤال...وماذا تريدين؟؟

هي تكرر السؤال وأنا أكرر نفس السؤال..

جالسة الأخت تستبله

ثم صمتت دقيقتين تقريبا وهي تسمعني أسألها تبغي مين .. ليش اتصلتي؟؟ما ردت ثم أغلقت السماعة............

خرج زوجي من الحمام ..طبعا لا حظ وجهي متغير

استفسر

أخبرته بأن طليقته اتصلت به من جوال الولد..سألته ايش تبغى منك؟

قال مستحيل تكون هي هذا ابني

عصبت وقلت له: ليش ما أعرف أفرق بين صوت حرمة ورجال؟؟واللهجة نفس لهجتها

اش تبغى الهانم؟ انفجرت عواطفها لما سويت العملية؟

لو بينكم شي يكون في النور ومايكون في الظلام


زوجي هدأني كثيرا

قلت له اسأل اولادك ليش اتصلت أمهم .. طالما اتصلت من جوال الولد أكيد بعلمه

قال راح يصير خير بس اهدئي..

زوجي بدأ يتحسن ويطيب وتحسنت صحته كثير..وخلال هذه الفترة..

كل ما ذكرته بإتصالها يهدأني ويقول ما بينهم شي وحيتصرف
.

الين جاء يوم وقلت له: قلت حتتصرف ..ايش سويت كلمت الأولاد؟

قال: لأ ...أصلا ايش دراك إنها هي..إنت ماتعرفي صوتها!!!

أنا عصبت عليه لأنه كذبني حسيت نفسي مت قهر

قلت له من بيتصل من جوال ابنك غيرها

وأنا ماكذبت ولا افتريت عليها ومو من مصلحتي أفتري عليها


قلت له: انا فاتحة بيتي وقلبي لعيالك وهم يطعنوني بالظهر

كلكم ستر وغطا على بعض ياعالم ايش اللي بيدور من ورايا..


المهم تزاعلنا بقوة واللي جرحني إنه مو مصدقني وسلبي في حقي


قال ايش اللي يرضيك؟

قلت له تقطع عنها مصروف شهرين((للمعلومية ماراح يتضرروا))

رفض قال المصروف للاولاد وهم ايش ذنبهم؟

قلته له ما أستبعد كلهم مشتركين معها هذه أمهم قلبهم عليها واكيد يتمنوا رجعتها

اللي أبغاه منك تحسسهم اللي سووه إنت ماتقبله إذا بالفعل إنت ماتبغاها ومو قابله


قال شهرين كثير شهر واحد قلت طيب

المهم نمنا زعلانين لانه أصلا مو متقبل اقتراحي وهو ماقال طيب إلا تسكيتة


وقام الصباح مطرطع ومعصب وترك البيت ومشي..


اتعافى وطاب ورجع لأسلوب الهجر

بكيت بحرقة..ولما هدأت اتصلت في أمي وقلت لها ترى انا وزوجي زعلانين وهو خرج

لا تسأليني عنه نهائيا إذا جد شي بتصل عليك واخبرك.

عشان ما تحرجني بالأسئلة..وأقدر أتصرف التصرف المناسب بهدوء .

وأنا نويت هذه المرة أطنشه لو شهر إذا مارجع لعقله بكيفه.. بيني وبينه الشرع وكفاية ذل و اهانات.

ماجا العصر إلا وعمتي تتصل في وتسالني أسئلة عن زوجي فهمت امي قالت لها..واضطريت أقول الحقيقة

لعمتي.

أمي ما تعرفوها .. تتصرف تصرفات غلط من باب المحبة والمصلحة وتوديني في داهية

كبيرة في السن ومتكالبة عليها الأمراض,, كيف أفهمها الصح من الغلط..

خفت أمي تسوي اعلانات أكثر لأحد ثاني

رجعت لعادتي الأولى وواصلته بالرسائل عشان يرضى ويرد علي

رغم إني من الداخل مطعونة ومجروحة..

((ومما كتبت له ماهكذا تورد الإبل يازوجي لو وسيلة عقابي ماعجبتك كان اقترحت الأسلوب الأمثل عشان تقهرها

ليش يازوجي ماقهرتها وقتلت قلبها زي ما قهرتني وقتلت قلبي طالما هي ماتعني لك شي أثبت لي هذا الشي

أنا طلبتك تقطع المصروف عنها عشان تفهم تصرفها ازعجك ومالها قبول عندك واللي يدل على حسن نيتي إني

ما طلبت مصروفها لي..فقط أردت تعاقبها وتضيق عليها وتعوض الأولاد لاحقا.))


المهم

محاورات ونقاشات طبعا..دايما انا الغلطانة

هو اللي تارك البيت وراميني بدون ادنى احساس بالمسؤلية وأنا الغلطانة

ههههههه مدري أضحك ولا أبكي .. من جد شي يموت قهر..

أنا قلت له ضروري تفهم نفسية المرأة وطريقة تفكيرها..الحريم مو زي الرجال

تركك لي في هذا التوقيت معناه تفضلها علي..وهذا الشعور مدمر وقاتل.


المهم

اتواعدنا كل واحد فينا يغير أسلوبه في التعامل مع الثاني

وقال لي: كل اللي تبغيه راح أسويه.....ههههههههههه يضحك على مين

المهم تم صلح الحديبية

لكن أنا طلبته مايرجع البيت من أسبوع لعشرة أيام لان نفسيتي جدا تعبانة..

والحقيقة قلبي مو صافي عليه اطلاقا.

واليوم هو اليوم العاشر وماجاب سيرة متى يرجع البيت..

طبعا منتظر عزيمة عشان يرجع ..والله قمة الإحتقار والإهانة لي.

يوميا نتكلم كأننا لسة مملكين ما اتزوجنا..هههههه هم يضحك وهم يبكي..
والله ماني عارف ايش أسوي.

ياجماعة الخير زوجي تركني ونحن في أحسن حالاتنا عشان طليقته اللي بيقول إنها ماتعني له شي

تركني في الوقت اللي خدمته فيها على حساب نفسي وصحتي وعملي..

أهكذا يكون جزاء الإحسان والمعروف.

انا بإحساس الانثى أحس الوضع ليس على مايرام والأمور فيها امور

عشان كدة زوجي سلبي في حقي وما وقفها عند حدها

أنا قلت له إنت سلبي في حق مسوي لنفسك خط رجعة

حياتنا غير مستقرة ومتى ما انتهت ترجع لها بسهولة


وياعالم يكون مرجعها اوناوي يرجعها.

مع العلم أنا ما أقبل بشريكة وهذا شرط من شروط زواجي وهو قبل

واللي يسأل ليش اخترت المصروف وسيلة للعقاب

مافي شي يتعاقبوا به غيره.

هم معتبرين أبوهم مصدر للفلوس وبس.

ولا لمست منهم الحب والحنان والتواصل مع أبوهم حتى وهو في أصعب حالاته لما سوى العملية

ولا هم بارين به.. البرما مر من جنبهم..

يعني حتى وهو مريض ماسألوا عنه بإتصال!! انا اللي أرسلت لهم رسائل ثالث يوم العملية قبل اتصال أمهم

أحنن قلوبهم على أبوهم..وهذه اول مرة أرسل لهم..حزني ولا ولد منهم مو جنبه.. شي يقهر.

مازاروه إلا بعد عشر أيام من العملية

أنا انجنيت والله كيف قلوبهم قاسية على أبوهم

قلبي على ولدي انفطر وقلب ولدي علي صخر

فمن رأيي مافي أي وسيلة لعقابهم غير هذه الوسيلة.

أنا مجروحة من سلبية زوجي بحقي وداخلي حزن عميق جدا..

زوجي محسسني إنه بايع ومستغني


أرشدوني

هل أنا بالغت في زعلي؟


وليش في رأيكم زوجي سلبي بحقي؟ يهمني رأي الرجال يفهموا تصرفات بعض.

هل أستمر على وضعي أمنع زوجي يرجع البيت حتى أتخذ القرار المناسب؟

أفكر جديا في الطلاق رغم إني ما أبغاه

زوجي ما أثق فيه بسبب تصرفاته..

ذقت منه جميع أنواع الغدر

ولسة أنتظر إلين يجيب الحرمة فوق راسي

آآآآآآآآآآآآآه اخاف تجيني سكتة قلبية


ولا


ألتزم الصمت إلين يرجع البيت بنفسه؟؟

ولا

أضغط على نفسي و أطلبه يرجع وفي هذه الحالة كيف أتصرف؟؟

خصوصا أنا ملاحظة إنه مبين عادي الوضع.. أو يظهر هذا الشي مكابرة مدري عنه..

وأحب أقول لكم شي رغم كل كميات القهر اللي ذوقني هي زوجي أحبه..وأحس بالحنان تجاهه
مهما قهرني أرجع أحن له وعليه..


لا تقولوا لي ايش حبيتي فيه؟؟ ترى هذا الشي مو بإيدي

وهذا السبب له دورمضيع شخصيتي معاه..رغم إن شخصيتي في الواقع مو ضعيفة.
وجهوني
كيف أتصرف

وكيف أسترد كرامتي من زوجي

كيف أقهر الحرمة وأموتها مليون مرة زي ماقهرتني


كثرت أسئلتي وطال كلامي..سامحوووووني

الله يجزيكم خير الله يجزيكم خير انصحوووووووووووووني محتاجة نصايحكم
رد مع اقتباس
 

مواقع النشر


ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


الساعة الآن 03:16 AM.


images