السلام عليكم ور حمة الله وبركاته

إخواني أخواتي بل وأهلي الأعزاء الكرام فأنتم أسرتي الثانيه و أعتز وأفتخر بأهل وأخوه وأخوات مثلكم وقد جئتكم اليوم في موضوع خاص ببنت صديقتي بل بنت أختي التي لم تلدها أمي فطالما أجدها في أحزاني وأفراحي إلى جانبي إما مواسية أومشاركه لي فرحتي ولا أخفيكم بأن لي
خمس أخوات من لحمي ودمي ولاكن لم يصلوا إلى منزلة تلك الأخت الصديقه فوالله الذي لا إله إلا هو إن كان بي حزن أخفيه وأداريه عن الناس مايحسون فيه لاقريب ولابعيد
إلا تلك الأخت تدرك مابداخلي من حزن وتقرأ أفكاري من كلماتي ونظراتي مهما سويت ومهما داريت عنها تحس باللي في نفسي وتسبقني بالسؤال عن ما يضايقني وأنا مهما سردت من أقوال وكلمات فلن أوفيها حقها أبد وأنا اليوم أشوف الحزن والهم ملأ قلبها ودمعتها أشوفها في عينها وتحاول تكتم آهاتها إللي أحس فيها من صوتها على ما أصاب إبنتها من مرض الله عز وجل إبتلاها فيه


‏)‏ علاقتي بالبنت وأخواتها (

بنتها أنا أعرفها وتربطني بها علاقه وطيده بالرغم من فارق السن بيننا فنحن نتحاور ونتناقش مثل الصديقات وبناتها ككل يعتبروني صديقتهم ولست صديقة أمهم فقط دائما نتناقش ونفضفض لبعضنا مثل الأخوات ونتصل على بعض ونتراسل بدون حواجز بالرغم من فارق العمر بيننا لاكن أ نا أرتاح لهم وهما يرتاحون لي والبنت هاذي إللي أصابها المرض الله العالم وش مرضها هل هو نفسي أو عضوي هيه ترتيبها بين البنات أخواتها الرابعه
بنت مؤدبه أخلاقها عاليه جدا وملتزمه بحجابها الإسلامي وحافظه مايقارب 20 جزء من كتاب الله الكريم صيام الإثنين والخميس مايفوتها إلا بعذر شرعي وتصلي ومطيعه لوالديها وكل مواصفات البنت الصالحه فيها نحسبها كذلك والله حسيبها ومنزلهم لاتوجد فيه أي وسيله من وسائل اللهو من قنوات أغاني أو مسلسلات يعني هما أسره محافظه جدا .


} قصة مرض البنت {

البنت تدرس أول سنه جامعه ونجحت من الثانويه ماشاء الله تبارك الله بنسبه عاليه جدا طبعا تخصصها علمي وكان حياتها طبيعيه وتوفت بنت أخوها كان عمر بنت أخوها 10شهور وعمتها بعد وفاتها تعبت نفسيتها
وعافت دراستها وصارت توسوس بالموت وتجيها ضيقه ورعشه في جسمها وخوف شديد وتقول تحس نفسها كأنها مو عايشه بين أهلها فقدت الإحساس بمن حولها وتحس بشئ يقول لها أنتي لو تموتي أحسن لك من هاذي العيشه شوفي وش تبغين بالناس الناس مصيرها تموت كلها موتي أحسن لك وتنتابها حاله من الخوف والرعشه في جسمها عقب صلاة الفجر تقول أصحى أصلي وأتجهز علشان أرو ح للكليه وأحس جسمي يقشعر وأحس بضيقه في صدري وجسمي كله يرتعش وتبدأ في البكاء وماتبغى الدراسه أبد ودوها أهلها عند شيخ قرأ عليهاالرقيه وأعطاها زيت وماء مقري عليه وقال لهم لو مانفع معاها هاذا العلاج ودوها لطب النفسي وحالتها ماتحسنت شالوها أهلها ودوها الطب النفسي قال لهم فيه عندها وسواس قهري وأعطوها حبوب تستعملها وأخذت منها أول حبه بغت تنجن على أهلها جلست ثلاثة أيام ماتذوق النوم فتركتها ورجعوها لعند شيخ ثاني غير الأول قرأ عليها آيات الرقيه وطلب منها إنها تغمض عينيها وتضع يدها عليها أثناء قرأءة الرقيه وقرأ عليها وبعدها سألها هل رأيت شئ أثناء قرأءة القرآن عليها قالت له نعم رأيت زميله لي كانت تدرس معي في الثانويه فطلب منها الشيخ أن تأخذ من أثرها المشكله إن زميلتها ماتدرس معاها في نفس قسمها بالكليه ولو طلبت منها زيارتها في بيتها أهلها ماراح يوافقو لها تجي عندها فطلب منها الشيخ إنها تاخذ قطعة قماش مبلوله وتمسح فيها طاولات الطالبات إللي عندها ودر ج الكليه
وبعدين تحطها في مويه في البيت وتغتسل فيه
وأعطاها أعشاب وحبوب من الصيدليه لاكن البنت كل هاذي مانفعت معاها البنت مازالت ولله الحمد محافظه على صلواتها وعلى الأذكار وعلى قرأءة القرآن الكريم وتقرأ كل صور القرآن الكريم وما تتأثر ماعاد في صورة البقره ماتقدر تقرأها ولو سمعتها يجيها خوف وضيقه في صدرها ورعشه في جسمها و تطلب من أهلها هما يقرأوها عليها هيه ماتقدر تقراها أبد أهلها يقرونها عليها وهيه خايفه ومرتعبه وتبغى أي أحد يجلس عندها لو شغلوها لها بالمسجل وهاذي حالتها والحين الإختبارات النهائيه على الأبواب والبنت رافضه الدراسه
تقول ماعاد تقدر تدرس ونفسيتها تأزمت أنا أتصلت عليها وسألتها وش فيك وش تحسين فيه قالت لي أنا كرهت الدراسه نهائيا سألتها فيه أحد مضايقك بالفصل قالت أنا في فصلي الوحيده إللي ماعندي صديقات كل صديقاتي في قسم ثاني أنا لحالي في فصلي قلت لها مافيه مشكله تعرفي لك على صديقات جدد وسولفي معاهم وإنبسطي قالت كل إللي في الفصل عندي شلل متجمعين كل ثلاث أو أربع بنات شله قلت لها تعرفي على وحده من هالشلل وصادقيهم قالت ما أقدر سألتها ليش قالت كلهم فاسدين وكل سوالفهم عن الشباب والترقيم والحب والمساخه وأنا ماقدرت أتحملهم
‏ أحس إني عايشه في بيئه فاسده وأنا ماتوقعت إن يوجد في الكليات بنات بهاذا الشكل
وكل ماجيت بنصحهم أشوف نفسي أنا وحيده بينهم وأخاف
على نفسي منهم وكمان تقول ما أرتاحت لدكاتره إللي يدرسونهم تقول كلهم هنود وباكستان حتى لغتهم بالإنجلزي ماتنفهم منهم يتكلمونها بلهجة بلدهم مو مثل الجنسيات العربيه تفهم منهم المحاضرات وتسألهم وتناقشهم وهي قدمت نقل من فصلها بس المديره رفضت
طلبها وقالت لها السنة الجايه ننقلك .
وهاذا أنا خطيت مشكلتها بكامل حذافيرها ووضعتها بين أيديكم يا أخوتي وأخواتي فأرجوكم رجاء أخت صغيره لأخوتها الكبار بأن من منكم عنده حل يحطه هنا ومن قد سبق ومرت عليه حاله مشابهه لحالة هاذي البنت وتشافت فيقولها لنا وكيف عالجها وأنا أعتذ ر منكم على الإطاله وعارفه إني أجهد تكم وأتعبتكم معي في قرأءة السطور الطويله ولاكن أنتم تعرفون أختكم في الله أنا ماحب أطرح موضوع أو أرد رد
إلا وهو كافي ووافي بإذن الله تعالى وأعتذر مرة أخرى وأنا في إنتظار مشاركاتكم النيره
وجزا كم الله خير الجزاء .

أختكم في الله أم سلطان

__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله