مساء الخير اخواني
بعد عودتي لزوجي صارت لنا شويه مشاكل
والحمدلله استقرت امورنا
وهو رجع لي احسن من اول بكثير
من كل النواحي
حتى الامور اللي كنت متضايقه منها عدلها
الحمدلله


اوكي وين المشكله
انو علاقته مع اهلي تغيرت 180 درجة
زمان يكلمهم يسلم عليهم
يتغدى عندهم كل اسبوع
يوجب معارفهم يعزمهم الخ الخ

بكمل شهر من رجعت
وملاحظه تغيره وساكته
اقول له بتتغدى عند اهلي؟ (كالعاده)
يتعذر بشي بايخ (لا مصدع)
وتكرر هالشي 3 اسابيع
واذا اخذني يدق على جوالي اطلعي
وانا ساكته
وازور اهله واكلمهم ماكأن صار شي
اليوم جا ياخذني
دق عالجوال: انا برا اطلعي
ركبت وقلت له: ليه ماتدق عالجرس؟!
قال: لي فتره ادق عجوالك عادي
قلت: بس اهلي مادروا بجيتك
قال: ايش علي منهم انا جاي اخذك!
قلت: اها اوكي
وماتكلمنا بعدها الى الان
تقريبا هذي اول مشكله تحصل بينا بعد رجعتي


انا ما اقدر طبعا اغصبه على اهلي
وبنفس الوقت مو متقبله نفوره منهم
وحتى اهلي بطلوا يسألوني عن احواله
لزموا عليه بأول اسبوع وطنشوه
هو متحاشيهم كلهم (ابوي امي اخواني الخ)
كأني مقطوعه من شجره
والخمس سنين الماضيه كان مايقطعهم ابدا ابدا

انا برأسي اقطع علاقتي باهله
يعني اعامله بنفس طريقته
دامه كره اهلي مو مضطره اجامل اهله
ويبقون مجرد اسماء.. زي ماهو حاب
بنفس الوقت ما احب الجو المتوتر
ولا ابغى افتح نقاش معه
حتى ما اسمع منه كلمه ممكن تكرهني فيه
خصوصا ان علاقتنا تحسنت كثير كثير
بس هذا اللي منكد علي


وللتوضيح
وقت المشكله (الشهرين)
والدتي عملت حظر لزوجي جوال وواتس اب
وكان منقهر كثير من تصرفها
ووالدة زوجي كانت صافه معه (حسب كلامه)
بس انا كبرت دماغي ونسيت كل شي

تم تعديل العنوان ليتناسب مع المضمون

مشكلة حظر ؟!!
حاولي تتقربين من اهله عشان تكسبينهم وتكسبين زوجك افضل من تقطعينهم وتسببين مشاكل

والله تدورين المشاكل دواره

يعني بتخاصمينه ليه ما تجامل اهلي ؟

وبعدين بدون زعل ترى حركة امك معاه ماهي حلوه لازم في اي خلاف خط رجعه .، واذا اهله معاك كويسين بالله باي منطق بتقاطعينهم لانه يتحاشى الاحتكاك باهلك .، تعاملك بنديه مستفز لزوجك ويبين انك تعشقين الدراما في حياتكم وتحبين تنكدين على نفسك .

نصيحه لا تغصبينه على شي خلي هو يهدأ مع الوقت وترجع العلاقه طبيعيه مافي اي طريقه سواء بالطيب او القوه بترجع العلاقه بينهم وكل الحلول اللي طرحتيها واللي تدور في راسك بتزيد الفجوه بينهم .

علاقتي باهله جيده
ازورهم واسلم عليهم واتواصل معهم
هذا طبعي من تزوجت
ولا عندي مشكله من هالناحيه


المشكله عنده هو
فجأة صار رافض يجامل اهلي
وتجاهلهم تماما
واهلي حسوا ولاحظوا بصمت
وهالشي مضايقني

كبري عقلك يا ام روان ولا تتخذين اي ردة فعل لفعل زوجك ولا تكلمينه ولا تقولين له شيء
اهلك مو محتاجين لزوجك الحمد لله قطعهم او وصلهم اكيد كل اللي يبغونه راحتك معه
حاليا استمري في توطيد علاقتكم مع بعض ،، فهميه نفسك الحلوة الطيبة اكثر واكثر حتى يترسخ في قناعته انك انسانه رائعه وليست مصطنعة

لاحظت في اغلب مشاكلك انك تحطين راسك براس زوجك
هو قطع عشان امي حظرته
انا اقطع عشان امه صفت معه

مع اني ارى امك اتخذت موقف مباشر تجاه بينما انه لم تتخذ شيء مباشر وكل اللي كان كلام منه ربما قاله حتى يعزز موقفه وهو مخالف للواقع !

معليش الحياة مو كذا ابدا ،، اذا بتتخذين ردات فعل دائما عشان تتساوون في الافعال فما راح تكسبين ابدا،، وبعدين اذا رماك في بيت اهلك والا طلقك لا قدر الله وراح وعاش حياته بتكتشفين انكم مو متساوين ابدا ،،،

نصيحة لك ،، قبل ردة اي فعل فكري ايش مكاسبك وايش خسايرك

قررتي تقطعين اهله كرده فعل ؟ ايش مكاسبك الشخصية والا على مستوى عيالك ؟
ايش خسائرك ؟ قارني بينهم ؟ وقرري
اما تتخذين قرارت عشان زوجك عمل كذا معليش اختي انت تهدمين بيتك بيدك

الناس الناحجة في حياتها تفكر قبل اي ردة فعل سواء كلمه والا فعل ايش المكاسب ايش الخساير ؟ ما تتصرف وفقا على افعال الاخرين

تخيلي الزواج شركة بينك وبين زوجك

كل زوج له اهداف من هذا الزواج وكل يسعى لتحقيق اهدافه ومو لازم الاهداف متطابقة

انت اسعي لتحقيق اهدافك انت احسبي خسايرك وارباحك من كل فعل وخطوة مو عشان شريكيك عمل ردة فعل اقلده وانا ما ادري لا عن ارابحي ولا خسايري
تلاقي زوجك حاسب مكاسبه وخسايره وانت لو عملت زيه ما راح توصلي لنتيجة مثله!

مافي شي يجي بالغصب ..

وعادي يا ما ناس علاقتهم بأهل زوجاتهم مو تمام والحياة ماشية عادي

مو مستوعبة تفكيرك زي ما قطع أهلي أقطع أهله!!

المفروض إنك فاهمة شعوره ومقدرة موقفه صورته انهزت قدام أهلك والآدمي ماله وجه وفوق كذا أمك حظرته.. !

لا تزعلي مني، بس للأسف إنت تحبي تسوي من الحبة قبة.. وكل شي تبغيه يمشي على كيفك بالملم ولو صار غير كذا افتعلت مشكلة..!

عفوا
انا ماعاملته بنديه
اقول لكم طويت كل شي
واعامل اهله برقي ووصل دايم
هو اللي تغير على اهلي
صار رسمي وجاف وبعيد
فقلت يمكن اذا قلدته يحس

مو قصه انتقم منه
بس ابغاه يحس ان تصرفه غلط
هذولا مهما كان اهل زوجته وعياله

يا الغاليه انا قلت فوره غضب وتروح
لكن ماراحت

انا اجامل اهله واتودد لهم كني بنت من بناتهم
وهو ساحب على اهلي ولاعامل لهم قيمه
هالشي جارحني جدا
محسسني اني ولاشي
مع ذلك ولامره ناقشته
صرت اختنق بالويك اند بسبب هالموضوع
اليوم لمحت له بس
وهو فهمني ورد بشكل جاف
فقصرت الشر وسكت.. خفت يغلط بالكلام

مرحبا روان..

مثل ما أنه بعد عودة المياه لمجاريها بعد انقطاع وخلاف يكون الوضع فيه نوع من الحواجز بالبداية والرسمية وغير ذلك (وسبق أن شرحتي في أحد ردودك لأحد الأعضاء هذا الشعور)، أعتقد أن الأمر نفسه، ليس بالضرورة كاره أهلك، ولكن لايدري كيف يذيب جبل الجليد، ربما أنه مستحي ومتفشل يقابلهم بعد اللي حصل، لكن أتوقع مجرد موقف عشوائي أو مصادف بين زوجك وأحد أفراد أسرتك ربما يذيب كل ذلك.
أرى أنه ماتشيلي هم، وبترجع الأمور غداً أو بعد غد أو بعد شهر إلى مجاريها.
إن طول الوضع يمكنك عمل حركة بطريقة وكأنها غير مقصودة أن يلتقي بأحد من أهلك وخاصة أبيك، وأنا متأكد أن أبوك بيستقبله وكأن شيء لم يكن.

__________________
ياصبحِ لاتِقبل !!
عط الليل من وقتك..

في نقاط بوضحها
لان بعضكم مافهمني

انا متعوده كل اسبوع ازور اهله تمام
هو كان يزور اهلي كل اسبوع
يكلم والدي وامي كل يومين
يدردش مع اخواني واتس
بكل زياره ياخذ لهم صينيه حلا او كيك
ويذكرني بوصلهم اذا انشغلت
واذا جاب شي قسمه بين اهلي واهله
وبيوم الام يهدي والدتي هديه ذهب زي امه

يعني علاقته فيهم ماكانت عاديه ابدا