نوروني الله ينور عليكم
أنا متزوجه من 6 سنين وكان عمري 17 ولي بنتين منه ومستانسه مع زوجي في بلد الغربه من اجل الدراسه ,وماباقي شيئ على رجعتنا للديار والأهل .
قبل 3 شهور حدث امر طارئ على زوجي . كان يكتب في الكمبيوتر علشان محاضره بيلقيها على القسم تبعه , انا جلست جنبه وفجأه شفت صورته مع وحده كنديه .. ماستوعبت لثواني ايش اللي صار , لما سألته ارتبك وقال لي ( بغيت اقول لك من زمان , هذي وحده انا تزوجتها ) انا ماصدقته وقلت لك ( انت تكذب علي) لأن حتى ظروفنا الماليه وحالة زوجي النفسيه مو مهيئه انه يتزوج علي.
أخذني بحضنه وفهمني انه تزوج على ورق لأنه كان يبغى يساعدها ( هي كانت ساكنه عند اهلها, عمرها 28 سنه ويصرفون عليها , وسمعت عن الاسلام وسألت ناس كثيرين وأشاروا لها انها تسأل زوجي , وكتب الله الهدايه على يده , بعد كذا اهلها طردوها وماصرفوا عليها , وزوجي تأثر فاتفقوا انهم يتزوجون على ورق عند شيخ , وبعدين صور معها على أساس انها تخلي اهلها يشوفون انها تزوجت منه ) والشيخ اللي عقد لهم حاول بزوجي انه يفكر بالموضوع . زوجي انسان يقدر المسؤوليه .
انا طاب خاطري ومشيت الموضوع على اساس انه ممكن اذا تحسنت اوضاعها ممكن يطلقها وتعيش حياتها .
اللي صار انه زوجي بعدها بشهرين من السالفه فاتحني انه قرر واستخار انه بيقدم على الزواج منها (يقول لأنها حرام يخليها مثل قول المثل ( رماه في اليم مكتوف الأيد – وقال إياك أن تغرقا))
أنا انسانه متفهمه للموقف بس مو متوقعه انه ممكن يقدم ويفكر بجديه بهالموضوع .. زوجي انسان ما هو شهواني او رغبه جامحه للجماع بكثره .. اصلا ماتهمه هالشغله هذي .. يقولي انه لو انه كان انسان يلعب بذيله كان لعب فيها وقبل مانرجع يطلقها ويتركها .. بس لأنه انسان يخاف الله , مايفكر يسوي فيها كذا
زوجي يحاول يقنعني اني انا الأهم والكل في الكل وأم بناته , وانه مافي مثلي , ويبغاني اوقف في صفه لما يعارضونه الجميع على هذا الزواج الثالث ( هو كان متزوج قبلي بس ماتوفق ) ولأن الحميع يعرف إني ماقصرت معاه وتحملته في الغربه .
انا واثقه في زوجي انه مايلعب وانه مسؤول .. بس ماأتخيل شكلي ارجع لأهي ومعي ضره على راسي . زوجي يقولي ( مارح يتغير شيئ عليك واللي تطلبينه مجاب .. بناتنا وانت مارح اقعد يوم بدون ماأشوفكم )
انا خايفه وماأدري ايش اسوي .. يحاول يقنعني ان الرسول صلى الله عليه وسلم تزوج 11 امرأه ومازال يذكر خديجه رضي الله عنها , وتزوج من اجل المصلحه العامه أو من اجل ان يصلح بين قبيلتين بالزواج من ابنة الزعيم اليهودي .
ياناس مو سهل علي ان يتزوج سواء لنفسه او من اجل انقاذ امرأه حديثة الاسلام ..
وانت تعرفون ان الرجال محلل لهم بالشرع اربع , يعني هو ماسوى شيئ محرم , بس مو متخيله اني انا يصي لي هالشيئ , واصلا زوجي ضد اللي يتزوج على زوجته إذا ماكانت مقصره معاه , بس شكله الحين بيسويها لأن مايقدر يرجع للديره ويتركها تصارع الحياة بروحها ..
الله يخليكم قولولي ايش ممكن اسوي ؟؟ والى الأن ماأقدر افاتح احد بالموضوع لأني انا عجزت اتقبل هالشيئ , وقلت له لا تتوقع مني اني ممكن اعاملك مثل اول واداريك لأن النفس ماتتحمل فوق طاقتها وانا هذي مقدرتي ...
عدا ذلك زوجي ماقصر معاي وانا أحبه مره ماأطيق افارقه وهو نفس الشعور ومايبغى اني ازعل عليه واتضايق منه بشيئ ودايما يطلعنا ويمشينا ويراعي مشاعري ويلبي طلباتنا .. بس هو على قولتهم ( مكره اخاك لا بطل ) الموضوع يقول انه صعب عليه ومعقد لأنه يكتب رسالة الدكتوراه ومافاضي لهاسوالف .
ماعندي احد من اهلي ممكن اقول له على هالسالفه .. الله يبارك فيكم ردوا علي وبردوا على قلبي .
والله المستعان .
احتاج لدعواتكم ,