كيف تزوج صاحبي ... نصيحة للجميع أدخلوا يهمكم جميعا ً
بسم الله الرحمن الرحيم
أيها الأخوات العزيزات
لا أعرفكن ، ليس بيني وبينكن سوى رابطة الدين
وهذا المنتدى الجميل ..
وبما أنكن أخوات لي في الله وقد آلمني والله جلوسكن دون أزواج أردت أن أحكي لكن قصة صاحبي الذي رزقه الله بزوجه ولكن وصفته تصلح لكن يا أخواتي ..
صاحبي هذا إنسان فقير ويدرس ماعنده من الدنيا إلا سيارته فقط ، ووده يكمل نصف دينه يبغى له زوجه حنونه تنسيه همومه يعيش معها لحظات الأنس والحبور والسرور ولكن ماعنده فلوس عشان يقدر يتزوج وبعدين طالب وأكثر الناس مايبغون يزوجون الطالب لأنه غالبا موقادر يتحمل أعباء الزواج ..
المهم صاحبي هذا جاء لأبوه قال له يا أبوي أنا ودي أتزوج ، قال له الأب والله ياولدي مثل ما أنت عارف الحال أنا والله ما عندي فلوس ومادام أنك عارف هالشي لا عمرك تجي تطلب مني زواج أنا يالله بالكاد أقدر على أمور البيت من أكل وشرب مو تجيني أزوجك .. روح الحين وعليك بالصوم لما يفرجها ربك وراح يتمسخر فيه ويضحك منه ويمزح ، الولد قال : يابييي الشرهه مو عليك الشرهه علي أنا اللي أطلب حاجتي من مخلوق وهو أنت يابوي ، ليش أنا ما أروح مباشرة للي يقدر يزوجني وهو ربي .. قال له الأبو : الله يوفقك ..
قال الولد تشوف يبوي والله لا أتزوج بإذن اللي ما تنام عينه والله إن تفرح بي ووالله إن تلبس البشت في عرسي قريب بإذن الله .. قال الأبو لا تكثر الحلوف ولازم كل واحد في هالدنيا ياولدي يعرف إمكانياته أنت الآن طالب ومن عايلة مستورة لا بد أنك تكمل دراستك وتنهيها وتتوظف وتجمع فلوس بعدين تعال كلمنا عشان نقول لأمك تدور لك حرمة ..
قال الولد بثقة عجيبة ( وش رايك بالفلان يبه ) والله يا أخواتي هذا الحاصل قال الأبو ( أنعم وأكرم ) بس أنا يا ولدي ما ودي تفكر وتتمنى وأنت لسا ما تقدر تتزوج لأنك بساطة موقادر ..
قال الولد : ( وشوفي الثقة بالله ) أنا يبه أطلب غني ولا أطلب منك شي أنا أطلب من اللي خزائنه ملئى أنا أطلب ربي منيب أطلب خلقه .. قال الأبو ( خيييير ) ..
يوم صار من يوم الأربعاء من نفس الأسبوع جاء الولد لأبوه قال له يبه أنا رايح لمكة قال الأب الله يساعدك ياولدي بس لا تنسى تدعي لنا .. سلم على أبوه وراح وكان يوافق التاريخ يوم 12 بالشهر ..
المهم راح لمكة واعتمر وجلس في الحرم مابين صلاة وذكر وقراءة قرآن ويوم صار يوم الجمعه اللي هو يوم 14 صام الرجال وأخذ معه الفطور للحرم .. يوم صار في آخر ساعه وهو صايم الأيام البيض وجالس في بيت الله ( شوف كم فضيلة )
رفع يديه وقال ( يارب أنا أطلبك وأنا في بيتك الحرام أنه مايدور الأسبوع إلا أنا مملـّـك .. ) وأثنى على الله وتضرّع بين يديه وبكى وألح على الله بالدعاء ..
وأنتم تعرفون ياخواتي أنه ربنا كريم ويستحي ( يستحي : ياربي ما أكرمك )أن يرد يدي عبده صفرا خائبتين فوالله يا أخواتي إنه الرجال مارجع من مكة إلا ابوه متصل عليه يضحك قال يا ولدي أنت تبغى الفلان اللي كلمتني عنهم جاد يقول صاحبي قلت والله هم أمنيتي وأتمنى أنه فلانه بنتهم تكون زوجة لي .. يقول قال ابوي خلاص تراني بكلمهم اليوم
وبالفعل كلمهم وكانت الموافقة من البنت نفس اليوم لانها سامعه عنه الزين والأخلاق والدين ..
يوم رجع الولد حبّ يضاحك ابوه وقال له : يبوي والله إنه مو أنت اللي زوجتني أنت فقط آله وسبب حركه الله لما أني دعيت ربي بيقين قال الأب والله غنك صادق يا ولدي إني ما أدري كيف يعني دخلت راسي الفكرة وأنا الي بزوجك من فلوسي ولا عليك إلا تجي بثيابك ياولدي ..
وش نستفيد يا أخواتي من القصّة
نستفيد فايدة عظيمة جدا ً وهي أنه اللي يجدع وجهه على ربه مايرده
إنه الدعاء سلاح عجيب واسألوا من جرّب .. إنه الدعاء وسيلة لتحقيق كل الأماني
وأهمها الزواج ..
اللهم يارحمن يارحيم يافارج الهم وياكاشف الغم ويامنزل القطر ويامجيب دعوة المضطر
أسألك أن ترزقني الزوجة الصالحة وأن ترزق أخواتي عضوات هذا المنتدى من المطلقات والأرامل والعوانس
الأزواج الصالحين الحنونين أصحاب القلوب الطيبة اللي يسعدونهن دنيا وآخرة ..
بالأخير لي طلب على كل من يمر على الموضوع :
انا خاطب حرمة أبيكم تدعون لي إن الله ييسر زواجي منها إذا فيها خير
وأن الله يرزقني الزوجة عاجلا غير آجل يا رب العالمين ..
شكرا لكم أحبتي
صالح بن صالح
ملحوظة / عايشت أحداث القصّة وهي حقيقية بكل تفاصيلها ..
13-02-2006, 07:24 AM
ضوابط المشاركة
العرض العادي
