المشاركة الأصلية كتبت بواسطة همسة فرح 2009

هههه والله حزنت عحالك ام يوسف كون عند ثلاث كتكوتات متلي وحاسة بمعاناتك
وفرحت للتطورات ياللي صارت بحياتك مع زوجك ربنا يديم عليكي نعمه
شوفي حبيبتي راح احكيلك جدولي وشوفي اذا بناسبك

1- اصحى من النوم الساعة 5ونص اصلّي الفجر وارجع انام تاني نص ساعة وارجع اصحا ع6 صباحا اشوف زوجي قبل ليروح شغله اذا بدو شي وبعد ميتسهل اروح اصحي بنتي الكبيرة للمدرسة على ماتفوت الحمام اكون حضرتلها ساندويشة المدرسة وفطور قبل ماتروح
طبعامعوداهم انهم يغسلو وجوهم ويلبسوا ملابس المدرسة لحالهم بس انا اسرحلهم شعرهم وانظم ملابسهم وفطرها واودعها للمدرسة بدعاء الخروج من البيت <<< لان مدرستها قريبة من البيت
2-تكون الساعة صارت تقريبا 7الاربع اروح اصحي بنتي الوسطانية للروضة على ماتفوت الحمام وتحضر نفسها وتلبس ملابس الروضة احضرلها ساندويشة وواحطها بالشنطة واسرحلها شعرها وانزلها تحت البيت تنتظر باص الروضة تكون الساعة صارت 7ونص
3- اروح الصغيرونة الحبوبة اطلعا من سريرها اغيرلها الحفوظة واغسللها واعطيها رضعتها على ماتاخدها اروح ارتب غرفة البنات وافتح الشباك ليتجدد الهوا فيها واحط الغسيل في الغسالة
4- اخدلي بريك شي ساعة عالنت اوارجع انام اصحى قبل رجوع البنات من المدرسة اروح انظف المواعين محل الفطور وارتب المطبخ واخد لي لفة عالبيت اكنسه عالسريع وامسح الغبار عن الاسطح الظاهرة زي الطاولات واثاث غرفة النوم والتلفزيون والمع المرايا الا والبنات رجعوا اخليهم يغيروا ملابسهم ويتنظفوا من اثار طلعة البيت ت كون الساعة صارت 1 طبعا لايخلو الامر من تنكيدات الصغيرة وكل شوي وانا رايحالها وبعطيها وجبتها وبنيمها فترة مابعد الظهر واصلي طبعا
5- اروح احضر الغدا وانافي المطبخ انظف محل الطبخ اول باول اي شي يتناثر عالغاز او طاولة المطبخ امسحها عالسريع وانظف المواعين اللي بستخدمهم كمان بنفس الوقت اول باول اركب الاكل عالنارواحضر عصير البرتقال ووجبة لبنتي الصغيرة طبعا يعني بطلع من المطبخ حوالي على الساعة 3 بعدالظهر احضر للبنات واغديهم وافوت الحمام اتاكد من نظافته مابخصصله وقت لاننا متعودين مين فات الحمام ينظف وراه ويظل نظيف طبعا لايخلو من اضفاء لمستي عليه
6- هنا ستوووب اكون انتهيت اخدلي بريك بعض الوقت اقضيه مع الصغيرة اوانام لونامت للعصر واكون موصية البنات يرتبو غرفتهم ويرجعوا كل شي مابستخدموه لمكانه
7- يرجع زوجي البيت اصلي العصر واحضرله الغدا واشوف بناتي يحضروا دروسهم وواجباتهم وبعدين بكون تقريبا من المغرب فاضية نوعا ما واي شي يتطلب نظافة وترتيب اول باول ومعودة بناتي عالترتيب والنظام وياويلهم لو بهدلو المكان ومارجعو رتبوه بس انا عودتهم يرتبو وينظفو مكانهم اللي يجلسو فيه وتعودو بحدود 8% الحمد لله
8-من بعد المغرب تقريبا افضى تماما للبنوتة الصغيرة العبها وااكلها وارضعا وبعد العشاء تقريبا 10تنام وييجي دور ابوهم بنسهر تقريبا بنام الساعة 12 وحسب اكتر اواقل وبهيك بنام وبيتي مرتب ونظيف الامن اشياء سطحية سريعة
اتمنى تستفيدي مني بشي ينفعك حبيبتي